李澤楷接受專訪：「唔想 BB生活在金魚缸」

城中鑽石王老五、電訊盈科主席李澤楷，與藝人梁洛施秘密產子消息經《蘋果日報》昨日獨家披露後，震撼全城。剛返回香港的新爸爸李澤楷昨日接受本報專訪時，難掩初為人父的興奮心情。他透露，希望寶貝兒子長治（Ethan）可以在不受騷擾的環境下成長，故暫時不打算讓兒子回香港居住，但稍後會帶他回港與爺爺李嘉誠見面。小長治是於 4月26日出生，健康成長至今已滿月，體重增加超過兩磅至近 10磅。　記者：何凱兒               
                       
榮陞爸爸的李澤楷昨整日忙於回覆祝賀他的短訊，儘管疲累，但仍感到非常開心。他透過電話接受本報專訪，輕鬆大談兒子經。
李=李澤楷
記=記者
記：恭喜晒，做咗爸爸心情點呀？
李：哈哈，好開心囉，係有計劃嘅，多謝晒。
記： BB同媽咪會唔會返香港居住？
李：暫時都唔會住，其中一個原因，係唔想 BB喺一個金魚缸嘅環境下長大……
記：你意思係咪唔想 BB成為公眾人物，俾傳媒監視住？
李：係，我希望 BB佢健康成長……佢哋（ BB與媽咪梁洛施）𠵱家喺北美，唔喺多倫多。
記：咁你爸爸（李嘉誠）有冇去探過 BB？佢見過 BB未？
李：遲啲冇咁忙，我會帶 BB返嚟香港見爺爺。
記：咁幾時帶呀？
李：哈哈，幾時帶就梗係……唔話你知啦！
記：你有冇幫手湊 BB？
李：（大聲說）有！喺嗰邊嗰陣咪有囉……不過佢（梁洛施）鍾意自己一手一腳湊。
記：點解生咗 BB，你同女朋友都唔打算結婚？
李：我哋兩個都冇呢個打算，暫時都冇討論過呢個問題。
記：咁女朋友幫你生咗個仔，你有冇獎勵佢？
李：其實點解要話乜嘢獎勵呢？因為兩個人都想有呢樣嘢（ BB），所以冇話獎勵唔獎勵，最大獎勵就係有個 baby囉！
記：你女朋友咁後生（梁洛施本月 23日才滿 21歲），做媽咪有乜感受？佢會唔會有好大壓力？
李：佢好開心……我哋係一早計劃咗，所以冇乜壓力……好幸運，佢後生，體力比較好，復原得好快……好幸運。

42歲的李澤楷過往鮮有向傳媒談及私人事務，今次破天荒接受訪問，明顯對小長治母子甚為着緊。梁洛施的發言人盧覓雪昨日向傳媒發放一張小長治的近照。相中BB躺在媽媽梁洛施的懷中，據知照片攝於滿月時，故比較本報昨日刊登、 BB剛出生時一家三口的合照，小長治長肉後更「紮實」，體重已近10磅，而其圓圓的頭形與大大的鼻子，相貌與爺爺李嘉誠有幾分相似。
去年 10月李澤楷提出電盈私有化時，梁洛施已懷有身孕；至本月26日、即小長治出生滿兩個月當天，正好是電盈周年股東大會舉行之日。有小股東表示，相信李澤楷到時會忙於弄兒為樂，但仍希望他履行主席的職能，出席股東會，聽聽小股東的聲音，和向他們交代一下私有化計劃由提出至失敗的始末。在主席添丁消息「冲喜」下，電訊盈科昨日收報 2.1元，升2.31%。與大市微升 0.96%、即 176點比較，電盈股價昨日可說是跑贏大市。


http://hk.apple.nextmedia.com/template/apple/art_main.php?iss_id=20090606&sec_id=4104&art_id=12846692