工展會負責人教女勿拍裸照

(明報)2010年1月5日 星期二 05:10
【明報專訊】工展會圓滿結束，仲有破紀錄人次，負責工展會嘅香港中華廠商聯合會副會長施榮懷都算飲得杯落。呢次工展會其中一樣令人印象最深刻嘅，應該係有工展小姐參選人畀人揭發影裸照，口的相仲喺互聯網上流傳，結果嗰個工展小姐自行退選。施榮懷非常緊張9歲嘅愛女，特別拎咗呢件事去教導愛女，千萬唔好影呢口的相，如果影咗，都千萬唔好放上網。

親子facebook 仔仔唔領情

為咗同子女溝通，施榮懷呢個老竇都算與時並進，佢噚日同記者食飯，講起自己開晒msn同facebook，想拉近同子女嘅距離，不過佢兩個仔似乎唔太領情，15歲大仔同12歲細仔都冇add老竇做「朋友」，msn亦對父親「隱形」，結果施榮懷想溝通都無辦法。

Emily就覺得呢種事都正常，佢兩個仔都應該唔想畀父親睇到佢口地同朋友之間嘅對答。飯局中同場嘅廠商會會長黃友嘉笑笑口話感同身受，但就死都唔肯講自己有冇開facebook戶口。