不知母已離世專心演出

【本報訊】宮粉紅昨晚在紅館前台出事時，陳寶珠正於後台準備演出，一直未接獲通知。
當陳媽媽在醫院傳出死訊時，仍未知情的陳寶珠正演出第二套折子戲份《柳》，故事講述寶珠反串飾演的小生柳毅，因未能跟劇中的龍王公主相戀，有情人未能得成眷屬而哭成淚人。她將悲情演繹得入木三分。

李香琴連聲稱惋惜
昨晚也有捧場的李家仁醫生，散場後得知宮粉紅出事，表現錯愕：「哎吔，我覺得（陳寶珠）冇乜異樣，佢嘅表現可謂絕無冷場。」黃杏秀亦替寶珠難過說：「吓，佢咁孝順仲有幾場點做呀，老人家新年咁樣都冇辦法。」
跟寶珠在粵語片時代已經合作無間的李香琴昨晚也是座上客，她對宮粉紅猝逝大表惋惜，她說：「佢（陳寶珠）仲有三場要做喎，點算呀。同寶珠好熟，佢今年 1月 1日，都有去佢生日會飲。當時，陳媽媽仲好精神，我話唱《鳳閣恩仇未了情》佢聽，佢仲識，而且仲認得我係阿琴，我都要安慰吓寶珠至得。」

唔敢請仙姐看演出
陳寶珠在台上表現專業，事實她上星期五去到沙田車公廟拜神，並且接受無綫電視節目《東張西望》訪問時透露，對於這趟演出的粵劇折子戲感到無比壓力，她在訪問時說：「我唔敢問仙姐（白雪仙）邊場嚟睇，最好就係仙姐嚟睇嗰晚唔好話畀我聽。我好驚，壓力好大，最好唔好俾我知，我又唔要望到，咁就最好。」問到是否叫她秘密前來？陳寶珠說：「係喇，係喇，我已經同嗰啲人講（指工作人員），邊個嚟睇你都唔好話畀我聽有咩人嚟睇。」