唐唐陣前換公關

[align=center][img=600,457]http://simg.sina.com.hk/cp/0/0075/4711/2/p.jpg[/img][/align][align=center]唐英年（右）噚日喺社協主席何喜華（左）陪同下，首次踩足10層樓梯到深水埗一幢舊樓天台，出席社協辦嘅基層論壇。圖為佢由天台樓梯離開。（李澤彤攝）[/align]【明報專訊】唐英年9月底辭任政務司長考慮參選特首後，請埋前政務司長許仕仁嘅前助手關鄭麗敏開嘅公關公司亞聯政經顧問公司幫手，點知Emily噚日得知，原來關太間公司同唐唐嘅兩個月合約剛好噚日到期，唐唐唔再續約之餘，仲請咗新一批公關幫手，唔知呢次可唔可以嚟個鯉魚翻身呢？
話說唐唐搵咗關太間公司幫手後，仍未能阻止民望跌勢，近期唐唐試瞓板間房體察民情，本來係好事，點知畀網民大肆惡搞唐唐瞓牀嘅相片，效果變成負面。至於唐唐換咗邊間公司，消息人士噚日賣關子，話遲啲記者就會知。

新金句：革命路線有得揀
唐英年噚日喺深水埗桂林街117號舊樓10樓天台出席基層論壇，佢被記者問到係咪真正體驗貧窮生活時，再度發揮「金句王」本色，佢話﹕「一個人嘅出身係冇得揀嘅，但一個人佢決定嘅『革命路線』，係有得揀嘅！」在場記者一時間反應唔到。
然後唐唐解釋話，原來「有得揀」係指佢9年前加入特區政府時，「已經決定抱住一個服務市民嘅心態」。
唐唐有親身體驗舊區生活嘅環節o架，平時車出車入嘅佢，首次行10層樓梯走到舊樓天台，其後喺露天論壇中，仲曬足個幾鐘𠻹。唐唐上次去探劏房住戶時都行過8層樓梯，所以今次佢應該唔會覺得太辛苦。