腦界生意慘淡　電腦節蝕多過賺

[img]http://static.apple.nextmedia.com/images/apple-photos/video/20130808/org/1375907733_02c2.jpg[/img]

電腦節繼續鬧雙胞胎，但都是辛苦經營，於會展的電腦通訊節，大灑400萬元補貼參展商劈價搶客，在腦場的電腦節，則幾乎難產才辦得成。歸根究柢因傳統電腦產品過氣，九成電腦舖轉型賣手提電話及配件等，僧多粥少下利潤太低。

[img]http://static.apple.nextmedia.com/images/apple-photos/apple/20130808/large/08la9p1.jpg[/img]
【砌機式微】■砌機於90年代最蓬勃，連小店亦能日賣百多部，惟近年已走下坡。

電腦通訊節本月23日於會展揭幕，主辦的電腦商會將首次補貼400萬推出瘋狂優惠，如每張25元入場券送最多50元優惠券等。參展商A-Grade老闆彭煒城透露，原價399元的外置叉電器，本已打算減至成本價199元，但因商會額外補貼，故擬再減。
另一常打對台的腦場電腦節，遲遲未公佈詳情，本報多次查詢後，主辦的電腦業協會回覆指，會於本月20日於深水埗、旺角及灣仔電腦場聯辦，但仍未提供展覽內容、優惠等。有業界透露今次展覽籌備工作較艱難，因不少商戶及供應商都大嘆無力再同時參與兩個展覽。
一個瘋狂派錢，一個幾乎難產，主因是業界生意低迷。電腦商會創會會長張耀成坦言，過去一年業界生意極差，因市場不健康，幾乎一面倒側重於Apple及Samsung的智能手機及平板電腦，不只桌上電腦，連手提電腦也失勢，迫使業界轉型，「科技講最新最潮，你做得呢行就一定要跟住潮流搵商機。如果𠵱家仲堅持只賣電腦，市場只會越來越窄」。

[img]http://static.apple.nextmedia.com/images/apple-photos/apple/20130808/large/08la9p2.jpg[/img]
【腦場轉型】■桌上及手提電腦失勢，腦場轉型賣平板電腦及手機配件求存。楊柏賢攝


[b]「餅唔夠分鬥賤價」[/b]
事實上，深水埗黃金及高登等老牌腦場早已轉型，賣平板電腦及手機配件比電腦還要多，數年前開業的始創中心數碼城，更是連一間電腦店也不剩。
於高登靠砌機起家的A-Grade，早已轉售手機配件，老闆彭煒城甚至放棄砌機生意，「針冇兩頭利，你只能夠放棄少少樹木，去換更大嘅森林」。
他看好電話配件市場，「你買咗隻雞，點都要買豉油，好多人成日換殼或者買多條cable返公司叉電，嗰幾十蚊大家唔太在意，好爽快」。不過，同行一窩蜂加入競爭，僧多粥少，「廿幾三十間舖着同一條褲，好難做」。

[img]http://static.apple.nextmedia.com/images/apple-photos/apple/20130808/large/a1201a.gif[/img]

正都電腦老闆John亦指，行業供過於求促成惡性競爭，「塊餅唔夠分，大家就鬥賤價，1,000蚊成本價可能賣1,005，甚至賣番1,000蚊，總之蝕錢都要平過你，咁點會有得賺？」他說個別產品利潤更少於0.1%，與高峯期的三成是天淵之別。
電腦節又會否是靈丹妙藥？「去咁多年都係蝕多過賺」John說參加在會展的電腦節，每次租用10個攤位，租金連人工近30萬，「賣一個Mon先賺嗰十蚊，圍到皮已經偷笑」。他批評電腦節辦得太密令吸引力大減，「今年索性唔去」。
電腦產品供應商也要變招，曾主打桌上電腦及砌機市場的Microworks，也轉攻音響及外置儲存裝置，「例如一個USB頭喇叭，用Notebook甚至連結手機Apps都可以出聲，唔一定死古古用Desktop」。

來源:蘋果日報網站