東鐵開枱夠霸氣　傾咩生意咁巴閉？

隨住「佔領中環」紙上談兵咗大半年，「佔領」概念已深入民心，市民不知不覺間喺日常生活上開始各種形式嘅預演行動。上星期五，港鐵東鐵線就上演咗一幕「佔領火車頭」行動，一對男女喺一班列車嘅第一卡，擺晒枱凳，當正車廂係佢哋私人辦公室咁。
直擊事件嘅乘客Adrian話，呢個移動辦公室出現喺黃昏放工嘅時段，前往紅磡方向嘅東鐵列車。呢對男女旁若無人，做嘢要緊。只見辦公女埋頭苦幹，喺記事簿上面填寫資料；辦公男就左顧右盼咁，仲放咗袋壽司喺枱面，好似想開餐咁。
曾經有港鐵職員提醒辦公男，車廂唔准飲食，辦公男就反擊話：「關你乜嘢事？我擺喺度之嘛，又冇食！」其後車廂越來越多人，開始有乘客不滿佢哋佔領咁多空間。其中一名男乘客出口干涉，隨即引發罵戰，粗口橫飛。
列車駛到大學站，有幾個收到乘客投訴嘅港鐵職員走入車廂，下令辦公男女收檔，事件終於告一段落。Adrian話，呢對夫婦操純正粵語，照衣着同口音睇嚟係本土香港人。

辦公男女舌戰乘客
男乘客（打電話）：喂喂，係咪港鐵？我想投訴車廂有人開枱！

辦公男：你老母咁多事做乜嘢？你邊到㗎！我旺角嘅！

男乘客：你話你旺角？旺角邊度？我砵蘭街㗎！你同我喺旺角落車！

辦公女：唔好嘈喇，唔好嘈喇！我哋趕時間先咁，唔好意思，唔好意思！


[img]http://static.apple.nextmedia.com/images/apple-photos/apple/20130902/large/02lp2p3.jpg[/img]
■一對男女帶齊枱凳，當正東鐵係私人辦公室咁。讀者提供圖片


來源:蘋果日報網站