2008-5-20 07:54
JICKYLE
被指冷血 網民圍剿
【明報專訊】四川嘅8級地震已經令到超過3萬人死亡，Emily同全國人民一樣，都覺得好心酸。但係 Emily噚日click上一啲網上討論區睇，發現有大班網民熱烈討論一名屯門區英中名校嘅中一女生，原來佢喺個blog度發表捐錢畀熊貓好過畀災民嘅「冷血」言論，令Emily好感慨新一代有啲咁嘅諗法！
個女生喺自己個blog講﹕「你地係咪嫌錢多先？？係嘅唔該畀熊貓……四川已經係死城，真係嘥錢。」
呢位妹妹仔仲話，「四川死多啲人仲好，醫院唔使咁迫，唔使無位，仲可以少件廢物。」女生又話佢無捐錢，但佢學校都籌到3.6萬元，另外又有美元、歐元同英鎊收，話四川今次真發達。她又寫﹕「5.16學校早會搞左個四川唔知咩，放咗d片，有段啲人（災民）係咁喊，佢地喊到好似笑咁，搞到我笑咗幾野。」
校長震驚 今日作輔導
有人睇咗佢呢嘅說話，激氣到暈，於是將段文貼上討論區，又有人貼佢嘅相，唔少網民大鬧女生無同情心。
Emily有同事之後聯絡咗女生間學校嘅校長，對方都話好震驚，但就話屬個別事件，今日會主動找該女生傾偈，「最重要嘅解決方法係輔導個女生，教導佢正確嘅價值觀」。教聯會主席黃均瑜就相信該女生喺感情上出現問題，先至令佢對四川災場麻木不仁。
[url]http://news.sina.com.hk/cgi-bin/nw/show.cgi/2/1/1/740943/1.html[/url]